Al è une vore probabil che la famee che par prime e à puartât chest cognon e fos a stâ intune posizion plui alte a pet dal nucli centrâl dal paîs. Cognon presint a For Davôtri e in cualchidune des sôs frazions (Pellicciari, 1973), e ancje a Osôf (chi ai 26 di Fevrâr dal 1685 Ms. Illario Di Sopra di Tolmezzo al spose D. Pasqua del Ben) e a Udin. Par Culine (For Davôtri) Agostinis 2001 al scrîf cussì: “Fra i prins a comparî (Joannes Antonius De Sopra f. Baptistae, n. 1603; Margareta Di Sora, m. 1603) al contribuìs a popolâ une vore i prins secui de anagrafe locâl (almancul 3 i nuclis familiârs presints za tal principi dal secul XVII) cuntune schirie di variantis cetant grande, come par esempli De Supra (la plui frecuente), De Sora e il bielonon, e nancje râr, Superioris (graciis al solit curât!). Al è di evidenziâ che a Culine no je la version compagne e contrarie Di Sotto, che invezit za a Sighiet si cjate. Di Sopra al è ancjemò presint a Culine, ma no tant che dissendence drete dai nuclis origjinâi, che li a son finîts tal 1935: la presince in dì di vuê e je leade a une gnove rivade di Gjiviane, tal 1911 (par dî il vêr prin di cheste a 'nd jere stade une altre - di Vuezis - tal 1755, ancje jê sparide). La forme che o cognossìn vuê (Di Sopra) e che o tratìn chi, e ven di sigûr de nestre regjon (30 in Friûl, suntun totâl nazionâl di 40), cuntune presince discrete tal cjâf lûc. Dut câs, lis variantis intun sens plui slargjât (ven a stâi chês cuntun riferiment topografic) a jemplin lis anagrafis di mieç mont, o almancul dal arc alpin nordorientâl: Soravia, Sopracase, Unterthaler, Innerhofer, e v.i. Un Di Sopra emigrât a Lubiane al devente lui stes, li, par comoditât e convenience, Oberhauser (al è l’esecutôr testamentari di Mattio di Tamer che al inviarà la istituzion de Mansionarie di Culine tal 1729). In ogni câs, a dispiet di dutis lis parentelis e lis analogjiis vicinis e lontanis, chest cognon Di Sopra al nas chi, a Culine, e cuntune origjin clare e trasparente… fin a un ciert pont. Sopra, sigûr, ma sore ce? In principi ducj i Di Sopra a jerin residents a Culine Piçule, e al somee che si spandin de cjase di Cjanôf e forsit ancje di chê di Codâr, che vuê i è dongje (une volte e jere dai Di Sopra). Dutis dôs a son cirche 5-6 metris sot dal nivel de strade. Nol veve di jessi cussì cul percors di prime (la strade che o viodìn vuê e à cent agns), che al passave plui in bas (e a Sud) a pet dai doi edificis. Al è clâr che al è un procès indiziari, ma al è pussibil che i Di Sopra a fossin chei di sôro (de strado), promovût in maniere ecelente a Superioris (notâ la finece dal solit gjenitîf latin dal curât)”. Intal Schedari Biasutti: 1560 Candido q. Leonardo de Sora de Collina; 1753 Caterina di Antonio q. Antonio q. Osvaldo di Sopra sposa Pietro di Giacomo di Tamer. Curiositât: dut il mont al è paîs e lis resons che a àn puartât ai cognons si cjatin, in maniere plui o mancul frecuente, in ogni popul e in ogni lenghe. Chi o citìn il cognon basc Uriounaguena, li che uri si riferìs a un centri abitât piçul, goena al vûl dî “disore” e -ena al è un sufìs.